Буџетот на УКИМ годинава е зголемен за повеќе од 24 милиони евра. Сметката на најдобриот Универзитет во Македонија од ланските 2,2 милијарди денари, достигна 3,7. Владата и Министерството за образование и наука преку конструктивен и социјален дијалог ги зголеми и платите во високото образование, па академиската фела од јануари годинава доби покачување од 14%.
„Владата за да покаже дека е фокусирана на образованието издвои поголем број средства, а конкретно за „УКИМ“ издвои милијарда и пол веќе од оваа година. Државата има потреба од наука, иновации, квалитено образование, така да и во иднините години ќе преземаме слични чекори“, изјави министерката за образование, Весна Јаневска.
Истовремено и очекувањата се големи. Министерката Јаневска на денешната научна конференција за предизвиците во високото образование, побара заеднички ангажман на сите релевантни чинители во изградбата на систем со модерни студиски програми.
„Целта е иста, а тоа е покачување на квалитетот на високото образование односно одлепување од дното на резултатите на ПИСА и ТИМС и покачување на Шангајксата листа“, изјави министерката за образование Весна Јаневска.
Целосната дигитализација на услугите на Универзитетот се очекуваат да започнат од овој месец. Најпрво ќе се дигитализираат сите студентски сервиси, а процесот целосно се очекува да биде заокружен до почетокот на учебната 2025/2026 година со воведувањето на електронскиот индекс.
„Ова е процес што ќе трае. Мојата претпоставка е дека во текот на една година или година и половина, овој процес може да се заокружи, но УКИМ влегува во овој процес и тоа е наш приоритет. Очекуваме дека од дигитализацијата и од подобрувањето на управувањето со квалитетот ќе имаме и подобрување на рангот на самиот универзитет“, изјави ректорката на Скопскиот универзитет, Биљана Ангелова.
Со цел унапредување на образованието на младите во земјава и нивна мотивација, УКИМ за студентската година 2024/2025 обезбеди повеќе од 290 стипендии. На овој начин на идните студенти драстично им се олеснија финансиските трошоци, а Универзитетот им понуди и нови студентски програми, како што е програмата за дигитално земјоделие како и неколку програми на англиски јазик. Инаку УКИМ се наоѓа на 1990 место на листата која ја прави Центарот за рангирање на светски универзитети. Тој е единствениот македонски универзитет кој се наоѓа на ова рангирање.
Љубиша Владимиров
