Градоначалникот на општина Штип, Иван Јорданов денеска организираше прием на Лука Ананиев, кој освои бронзен медал на Европското првенство во борење за борачи до 15 години, а што се одржа во Самоков, Бугарија. На средбата присуствуваа и Марио Ананиев, Зоран Шоров, како и тренерите и соработниците кои придонесуваат во развојот на младите спортисти.
Јорданов му го честиташе големиот успех на Лука Ананиев, кој е стипендист на Општина Штип во рамките на Правилникот за поддршка на успешни ученици спортисти, истакнувајќи дека ваквите млади таленти се иднината на македонското борење и спортот воопшто.
Тој нагласи дека овој значаен резултат претставува гордост не само за Штип, туку и за целата држава, бидејќи успехот на младите спортисти е најдобрата потврда за нивната посветеност, труд и истрајност. Јорданов на средбата рече и дека еден од приоритетите на општина Штип во наредниот период ќе биде понатамошното подобрување на условите во спортската инфраструктура и создавање подобри можности за работа и развој на спортистите, со цел остварување на уште поголеми успеси на домашната и меѓународната сцена.
