Бог се јави- навистина се јави! Православните христијански верници го празнуваат празникот Богојавление.
„Велик си Господе, судни се твоите дела и ниеден збор не ќе биде доволен да ги испее твоите чудеса“– вели г.г. Стефан.
Голем број граѓани се собраа на мостот „Слобода“ за заеднички да го прослават еден од најзначајните христијански празници. За нив, Водици претставува ден исполнет со духовна симболика, а меѓусебно си посакаа здравје, љубов и спокој.
„Овој ден е еден од најубавите верски празници во Македонија и да ни е за многу години. Масовно народот излегува да се дружи. Самата симболика на празникот дека Бог се јави и почнува тоа да се применува меѓу граѓаните, ги сплотува и верувам дека ги облагородува. Посакувам така да биде и кај нас. Посакуваме мир, бериќет во куќа и здравје.“– велат граѓаните.
Меѓу над стотината учесници кои скокнаа по светиот крст во главниот град, најсреќен беше дваесет и четири годишниот Дарко Митровиќ. Тој беше даруван од архиепископот на Македонската православна црква – Охридска архиепископија – г.г. Стефан, од градоначалникот на Скопје Орце Ѓорѓиевски и од повеќе поддржувачи на манифестацијата, кои му посакаа добро здравје и многу успеси.
Одбележувањето на празникот почна во храмот „Рождество на Пресвета Богородица“, каде што чиноначалствуваше архипископот г. г. Стефан.
Празникот Богојавление се празнува уште од вториот век. Според христијанското предание, токму на овој ден Свети Јован Крстител го крстил Исус Христос во реката Јордан. Поради чинот на големиот водосвет што го извршува црквата, празникот е познат и под името Водици.
Верувањата велат дека оној што ќе го фати крстот ќе го следи среќа, благослов и бериќет во текот на целата година. Фаќањето на крстот симболизира духовно соединување со Христа, а се смета дека по осветувањето, водите добиваат лековити својства.
