Блискиот Исток не мирува ниту за светиот муслимански празник Рамазан Бајрам и персиската Нова година.
Израел утрината го бомбардираше Техеран, а Иран возврати со напади кон Ерусалим и соседните арапски земји.
Саудиска Арабија, Кувајт, Бахреин и Обединети Арапски Емирати пријавија напади со ракети и беспилотни летала, при што погодена била и кувајтската рафинерија Мина ал-Ахмади.
Оваа рафинерија е погодена по втор пат од почетокот на конфликтот. Таа важи за клучна за економијата на малата заливска земја бидејќи може да обработува 730.000 барели нафта дневно.
Израелскиот премиер Бенјамин Нетањаху изјави дека ќе ги одложи понатамошните напади врз гасните полиња на Иран, на барање на американскиот претседател Доналд Трамп.
Таа изјава предизвика благ пад на цената на нафтата од 1,6 проценти, односно денешната цена за суровата нафта изнесува 106,90 долари за барел.
По гласините дека Израел ги втурнал САД во конфликтот, Нетањаху во своето обраќање на прес-конференција негираше дека неговата влада го втурнала Вашингтон во војна.
„Дали некој навистина мисли дека некој може да му каже на претседателот Трамп што да прави? Ајде. Претседателот Трамп секогаш ги донесува своите одлуки за тоа што мисли дека е добро за Америка. И можам да додадам дека мислам дека е добро и за идните генерации“, изјави Нетањаху.
Меѓународната агенција за енергија презентираше серија предлози за ублажување на притисокот врз цените на нафтата за потрошувачите, вклучувајќи работа од дома и избегнување авионски патувања.
Предлозите доаѓаат откако агенцијата овој месец се согласи на рекордно ослободување на нафта од стратешките резерви како одговор на последиците од војната меѓу САД и Израел со Иран.
„Неодамна го започнавме најголемото досега ослободување на нафта од резервите за итни случаи на ИЕА. Јас сум во постојан контакт со клучните глобални влади, вклучувајќи ги и големите производители и потрошувачи на енергија, како дел од нашата меѓународна енергетска дипломатија“, изјави Фатих Бирол, извршен директор на ИЕА:
Американскиот претседател Доналд Трамп во меѓувреме оствари средба со јапонската премиерка Санае Такаичи. На прашање поставено од јапонски новинар зошто САД не ги известиле сојузниците пред да почнат со нападите врз Иран на 28 февруари, Трамп кажа дека така се задржал елементот на изненадување.
„Кој знае подобро за тоа? Зошто вие не ни кажавте за Перл Харбор? Вие верувате во изненадување исто колку и јас“, изјави Доналд Трамп.
Конфликтот предизвика најголемо нарушување на снабдувањето во историјата на глобалниот пазар на нафта, принудувајќи ги производителите околу Заливот колективно да затворат околу 10 милиони барели дневно производство, според Меѓународната агенција за енергија.
Мартин Трајчевски
