Со бесплатни часови по математика, физика, хемија и биологија до подобри резултати на државна матура, но и зголемување на интересот за техничките факултети. Штипскиот Универзитет ја стартуваше програмата „Иницијатива за идни научници„ со која на матурантите до мај ќе им помогне да ја совладат материјата, но и да се наоружат со знаења, кои ќе им бидат потребни за нивното понатамошно академско доусовршување. Наставата ќе се одвива на Универзитетот и ќе ја држат универзитетски и професори од средните училишта.
„Целта ни е да се доближиме до идните студенти, односно да ги мотивираме да ги изучуваат природните науки и да им помогнеме преку една подготвителна настава да имат подобри резултати на престојната државна матура. Тоа е активност која целосно е финансирана од страна на универзитетот и ќе ја спроведеме заедно со заинтересираните ученици и со универзитетски професори и со наставници од средните училишта„ изјави ректорот на штипскиот УГД, проф.Дејан Мираковски.
Доколку матуантите покажат сериозен интерес, ќе се направат напори ваква подготвителна настава да има и за останатите предмети, односно македонски и странски јазици. Според ректорот Мираковски, високите оценки на државната матура за студентите, значи поголема можност за запишување на програмите за кои се одлучиле.
„Дефинитивно, високите отценки преставуват поголема можност за запишување, пред се да влезат во државната квота, односно целосно да бидат финансирани од државата и со сигурност ќе им го олесни идното студирање. Ние сме должни да им помогнеме на студентите независно дали ќе останат овде или ќе студираат на друго место, иако сметат доколку им ги покажеме условите и можностите коишто им ги нудиме и имаме, ќе не земат како една од опциите за нивно идно студирање„ изјави ректорот на УГД, проф. Дејан Мираковски.
Наместо зголемување, секоја година има благо намалување на просечната оценка на државната матура. Лани, средната оценка беше 3,25, а за да се обезбеди поголема контрола во тестирањето и да нема препишувања, полагањата беа организирани во холовите и спортските сали во училиштата.
Александра Ристевска
