Преговорите предводени од Соединетите Американски Држави во Саудиска Арабија со делегациите од Украина и Русија напредуваат добро и наскоро се очекува позитивно соопштение, изјави извор за Ројтерс од Белата куќа.
Делегацијата на САД се сретна со украинските претставници во Ријад во неделата, а вчера и со руските претставници. Разговорите главно беа фокусирани на прекин на огнот во Црното Море, но претседателот Трамп рече дека се појавуваат и други прашања како дел од неговите напори да стави крај на тригодишната војна во Украина. Од Москва досега не беше добиено никакво официјално потврдување за текот на разговорите, освен кратко известување дека заедничкото соопштение со американската делегација ќе биде објавено денеска. Руски медиуми од Ријад објавија дека по завршувањето на 12-часовните руско-американски разговори, претставниците на Москва биле „добро расположени“.
