Пратениците од Собранието на Македонија, Калтрина Беќири и Миле Лефков, учествуваа на состанокот на Парламентарниот комитет на Централноевропската иницијатива (ЦЕИ-ПД), кој се одржа на 26 и 27 мај 2026 година во Букурешт, Романија, на тема „Унапредување на регионалната соработка и поврзаноста за одржлив раст во регионот на ЦЕИ“.
Како што соопшти собраниската прес-служба, пратениците учествуваа со дискусии во првата сесија на состанокот посветена на унапредување на европската интеграција преку прекугранична соработка во регионот на ЦЕИ.
Во своето обраќање, пратеничката Беќири истакна дека прекуграничната соработка е клучен двигател на европската интеграција, нагласувајќи дека заедничките проекти во инфраструктурата, образованието, младинската мобилност и заштитата на животната средина придонесуваат за стабилност и економски развој во регионот.
Лефков во својата дискусија истакна дека Коридорите VIII и X претставуваат стратешки транспортни и инфраструктурни врски за Македонија и регионот, кои ќе придонесат за посилна регионална поврзаност, економски развој и побрза европска интеграција.
Тој нагласи дека политиката на проширување на Европската Унија треба да остане кредибилен, предвидлив и процес заснован на заслуги, со јасна поддршка за европската перспектива на земјите од Западен Балкан. Лефков се осврна и на важноста од зајакната регионална соработка во областа на кибербезбедноста и заштитата на критичната инфраструктура.
На состанокот беше истакната важноста од заеднички активности и координација меѓу земјите членки на ЦЕИ со цел поттикнување на економскиот развој, одржливиот раст и европската интеграција на регионот.
