Украинскиот претседател Володимир Зеленски повторно бил цел на неуспешен обид за атентат, а овојпат во планот бил вклучен полски воен пензионер, кој уште одамна бил регрутиран од Советскиот Сојуз. Ова го соопшти генерал-потполковник Васил Маљук, директор на Безбедносната служба на Украина (СБУ), на затворен брифинг за украинските медиуми, на кој детално го објасни планот што бил осуетен со заедничка акција на украинската СБУ и полската безбедносна агенција ABW.
Според Маљук, руските служби ангажирале човек со задача да го ликвидира Зеленски на аеродромот Жешов-Јашонка во Полска, користејќи дрон со камера од прво лице или снајперска пушка, објави TSN. Осомничениот, кој со години останал лојален на советската идеологија, ја задржал таа лојалност и децении подоцна. Сепак, планот бил откриен навреме и спречен, објави „Њузвик“.
Володимир Зеленски бил цел на повеќе неуспешни обиди за атентат од почетокот на руската инвазија врз Украина во февруари 2022 година.
