Протоколарна средба без поместување на позициите на двете страни. Вака дел од аналитичарите го оценија вчерашниот прв состанок меѓу шефовите на дипломатиите, Тимчо Муцунски и Велислава Петрова Чамова. Тие не очекуваат некакви промени во водењето на надворешната политика ниту на Македонија, ниту на Бугарија. Приближувањето на ставовите во овој момент, според нив, се чини невозможно.
„Реално добро е што се среќаваат министрите на Бугарија и Македонија и што има некакви разговори. Подобро да има некакви разговори отколку да нема никакви разговори. Не очекувам некакви спектакуларни поместувања, но во секој случај, потребно е прво ЕУ да се реформира и подоцна да се изнајдат решенија за вакви ситуации, како ова што и се случува на Македонија. Можеби ќе има подобрување на односите во билатералниот дел, но во делот на придвижување на Македонија кон ЕУ, не верувам“ – вели Синиша Пекевски – аналитичар.
Муцунски на средбата ги повторил ставовите дека нема да се преговара за македонскиот јазик, идентитет и култура. Тој зборувал за заштита на македонското малцинство во Бугарија. Бугарската министерка Петрова Чамова пак ги повторила цврстите позиции дека Македонија треба целосно да ги спроведе обврските преземени кон ЕУ, како единствен начин за напредок кон Унијата. Пекевски вели дека ЕУ треба активно да покаже дека го штити македонското малцинство во Бугарија. Од друга страна, смета дека бугарските амбиции нема да престанат со Уставните измени, туку дека тие ќе го оптоварат евроинтегративниот пат на земјава со нови барања.
„Тоа веќе на сите им е јасно. Тоа ќе биде почеток, внесувањето на Бугарите во Уставот. Ќе се бара промовирање на тие права, државна помош или поддршка, сопствена програма, поддршка на НВО. Апсолутно го користи ова што е членка на Европска Унија. Ние не сме во поцизија. Тоа на сите им е јасно“ – вели Синиша Пекевски – аналитичар.
Опструкцијата на Бугарија кон Македонија ја критикуваше и поранешниот министер на Германија, Михаел Рот. Тој порача дека ваквата пракса е неодговорна и треба да престане, бидејќи ја ослабува Унијата, односно ја прави ранлива на надворешни влијанија од Кина и Русија.
Од друга страна, двете земји треба активно да работат на заедничките економски проекти како изградба на железницата на Коридор 8. Македонија и Бугарија се согласија заеднички да го изградат со европски пари железничкиот тунел на самата граница. Ова треба значително да ја зајакне трговската соработка меѓу двете држави.
