Консолидирани продажби од 202,7 милиони евра, раст на консолидираниот извоз од 15 % и инвестиции од 20,2 милиони евра во периодот јануари – септември 2023. Македонскиот фармацевтски гигант „Алкалоид“ објави позитивни податоци за работењето заклучно со третиот квартал годинава.
Според единечниот биланс на успех, во периодот јануари – септември 2023 година продажбите достигнуваат 9.212.341.451 денари, што е за 13 % повеќе во споредба со истиот период од минатата година. Вкупните консолидирани продажби, пак, достигнуваат 12.483.936.387 денари, што е за 14 % повеќе во споредба со истиот период од минатата година.
Консолидираните продажби остварени на домашниот пазар се зголемени за 10 %, а вкупниот консолидиран извоз на компанијата е зголемен за 15 %. Од вкупните консолидирани продажби 30 % се остварени на домашниот пазар, додека, пак, 70 % се остварени на странските пазари.
Најголем пораст кај извозните пазари, во споредба со првите девет месеци од 2022 година, бележат продажбите остварени во Канада, кои се зголемени за 40-пати; потоа во Италија, каде што се зголемени за повеќе од 30-пати; во Јужна Африка за 5-пати; во Австрија за 4-пати, како и во Чешка и во Чиле, каде што се зголемени за трипати. Потоа следуваат оние во Велика Британија (раст од 87 %), Ерменија (раст од 64 %), Романија (раст од 63 %), во Монголија (раст од 26 %), Албанија (раст од 24 %), Бугарија (раст од 14 %), во Украина (раст 12 %), Хрватска (раст од 11 %), Босна и Херцеговина (раст од 8 %), во Србија (раст од 6 %) итн.
Вкупните инвестиции во основни средства во периодот јануари – септември 2023 година изнесуваат 1.240.857.214 денари и во споредба со остварените во истиот период од 2022 година бележат раст од 47 %. Ваквото зголемување се должи на најголемиот инвестициски проект на АЛКАЛОИД во последните 20 години – новото производствено одделение за производство на цврсти форми 2 – со кој се зголемуваат капацитетите за производство на цврсти форми за повеќе од двапати.
Единечната добивка пред финансиските трошоци, даноците и пред амортизацијата (ЕБИТДА), која изнесува 2.096.790.692 денари, бележи зголемување од околу 9 %, додека, пак, единечната нето-добивка изнесува 1.299.694.920 денари и е зголемена за 12 %. Во периодот јануари – септември 2023 година во АЛКАЛОИД АД Скопје е реализирано 191 ново вработување
