Новиот министер за здравство, Азир Алиу, ја презема координацијата по трагедијата во Кочани. Министерството ќе го води целиот процесот на распределба на донации за семејствата на настраданите и повредените, со најавена работна група и јасна насока.
„Мислам дека е време да направиме строги протоколи како ние ќе работиме, кои ќе работи каков тип на услуги ќе нудиме, каков тип на инфраструктура ќе креираме, се со цел да не се дуплираат тие процеси. Исто така веќе креираме работни групи за кризен менаџмент кои што секој од нив ќе има јасно дефинирани опис на активности што ќе ги има“, изјави министерот за здравство Азир Алиу.
Министерството веќе има одговорено и на барањата за нов кадар и опрема за нега на овие пациенти.
„Веќе е одговорено веднаш, знаете дека салата во подрумот на болницата интезивно се работи, веќе во фаза, мислам дека за две три недели ќе биде функционална“, изјави“, Алиу.
Алиу најави отворање на нов, иновативен младински центар во Кочани – простор за поддршка, активности и психосоцијална стабилизација. Во Скопје пак – прв тест за Алиу ќе биде ветената системска пристапност на Клиничкиот центар и решавање на хаосот со паркинзите. Министерот најави краткорочно и долгорочно решение кои треба да обезбедат нови 500 паркинг места.
„Ќе почнеме од базичните инфраструктурни чекори активности за да видиме точно колку паркинг места има внатре. По анализата длабока која ја правиме ќе видиме колку има пациенти кои ги користат тие паркинг места, колку вработени па ќе излеземе со решение“, изјави Алиу.
Алиу најави пет столба за поуспешно здравство, три временски линии и еден транспарентен портал на кој ќе бидат сите податоци јавно достапни. За реализација на се што има замислено, министерот тврди дека ќе работат наменски групи од по 10 луѓе, кои ќе се среќаваат еднаш неделно, а помош од понеделник ќе пристигне и од Светската здравствена организација.
