Со поздравот Христос воскресе, навистина воскресе, свеќи во рацете и традиционалното кршење со јајца, на полноќна служба Македонците кои живеат во Пјаченца, Италија ја дочекаа веста за христовото воскресение.
Стотици верници во храмот Прохор Пчински се помолија за здравје, радост, мир.
Граѓаните го дочекаа Велигден запазувајќи ги православните обичаи. Пред полноќ, со свеќи во рака завртеа круг, а точно на полноќ симболично тропнаа на црковните порти за да се отворат за синот божји.
Верниците велат дека се среќни што традицијата продолжува и се пренесува на идните генерации. За Македонците кои живеат во Пјаченца е од особено значење тоа што ја имаат црквата и имаат каде да ги прослават празницитe
Синоќа заврши и велигденскиот пост. По полноќ се одржа богослужба, а верниците кои постеле ја примија светата причест.
На вечерната служба претходеше лицитација, а парите собрани од истата се наменети за црквата. Воскресна литургија се одржуваше и утринава каде граѓаните запалија свеќа и се помолија за здравје и благосостојба.
Инаку, годинава се поклопува чествувањето на двата Велигдена, православен и католички.
Велигденските камбани се слушнаа и од католичките храмови. Тие исто така беа полни со верници кои присуствуваа на Велигденска миса.
Заедничкото чествување не се случува често, бидејќи источната и западната црква користат различни календари јулијански и грегоријански.
Последното славење на Велигден на ист ден беше во 2017 година.
