Муцунски му ги поништи огласите на Османи. Алфа неофицијално дознава дека шефот на дипломатијата одлучил да поништи огласите за дипломати оти тие биле објавени незаконски, веднаш по завршување на изборите. Официјална потврда за ова од министерството се уште нема, но како што дознава Алфа станува збор за огласи кои објавени пред формирањето на новата влада, за позиции таксани за кадри на ДУИ.
Муцунски уште во старт на мандатот најави дека ќе преиспитува што се случувало во последните три месеци од работењето на Бујар Османи, кој во финишот од неговиот мандат распишал дури 16 интерни огласи и на работа во дипломатско кознуларните претставништва испратил 14 нови дипломати. Од нив седум беа пратени на мандат во дипломатско – конзуларните претставништва, а седум на испомош. Односно, пред да се збогува со министерската кариера Османи распиша конкурс за дипломати во ОН во Њујорк, во амбасадите во Москва, Тел Авив, Токио, Рим, Киев и во генералниот конзулат во Њу Џерси. За пониски дипломатски звања се бараа заинтересирани за во амбасадите во Лондон, Берлин, Астана, Бразилија, Осло, Варшава и во генералните конзулати во Истанбул и Минхен.
За распишување на огласите од МНР тогаш се правдаа дека станувало збор за редовни административни циклуси, иако за конкурсот остри реакции и осуди имаше од поранешни дипломати, министри за надворешни работи, како и македонскиот дипломатски синдикат.
Османи се обиде масовно да испрати дипломати на мисии и за време на предизборниот преиод, но не успеа, бидејќи законот забранува такви одлуки за време на кампања. Османи беше и под лупата на антикорупциската комисија, бидејќи 15 служебни возила на МНР и две на агенцијата за разузнавање се користеа во партиски цели на локалните избори. Скандал за кој од тогашната влада побараа само објаснување.
Инаку до сега на консултации во Скопје се повикани тројца амбасадори. Љубомир Фрчковски, македонски амбасадор во ОН, Весел Мемеди амбасадор во Италија и Данчо Марковски, амбасадор во Албанија. Фрчковски е повикан поради сомнежи за финансиски малверзации и непочитување на препораките на МНР, Мемди доаѓа од Рим за неговиот самостоен и некоординиран повик за употреба на пасошите со новотo име, а Марковски, по скандалозниот попис во Албанија.
