Министерството за здравство информира дека, по најавите за пеколни температури, денеска се активира „Фаза три“ за заштита од топлотниот бран, која ќе трае до 8 јули.
Владата донесе препораки за ослободување од работни обврски на бремени жени и луѓе постари од 60 години, што не се однесува на вработените во здравството, полицијата, армијата, транспортот, енергетиката и јавните комунални претпријатија.
Препорака има и за одложување на работниот процес од 11 до 17 часот за работници изложени на директна топлина. Се препорачува и работа од далечина, флексибилно или двократно работно време – таму каде што е изводливо.
Македонија е погодена од топлотен бран. Во следните денови се најавуваат максимални температури до 41 степен.
