Советот на Општина Делчево донесе Одлука за формирање Просторни сили за заштита и спасување, со цел зголемување на подготвеноста за справување со природни и други непогоди на локално ниво.
Согласно одлуката, силите ќе дејствуваат на подрачјето на општината и ќе имаат задача да обезбедат заштита и спасување на луѓето и материјалните добра. Просторните сили се организираат како Универзална единица за заштита и спасување, формирана во состав на вод со вкупно 19 припадници.
За нивниот ангажман е предвиден паричен надоместок, при што припадниците ќе добиваат 3 проценти од просечната месечна плата по работник во државата, објавена од Државниот завод за статистика за претходниот месец, по реален ангажман. За раководните лица, надоместокот изнесува 5 проценти по реален ден ангажман.
Исплатата на средствата ќе се врши врз основа на наредба за активирање донесена од градоначалникот или овластено лице, како и согласно евиденцијата за извршен ангажман. Финансиските средства за оваа намена ќе се обезбедуваат од Буџетот на Општина Делчево.
