Високиот функционер на СДСМ, Рубин Земон, поднесе оставка од партиската функција по реакциите во јавноста за неговата средба со бугарскиот активист Виктор Стојанов, кому му е забранет влез во Македонија.
Земон, кој неодамна беше претставен како засилување во Извршниот одбор на СДСМ, во изминатиот период се најде во центарот на повеќе контроверзии. Претходно предизвика реакции со ставови поврзани со Гоце Делчев, а сега и со средбата во Софија со Стојанов, кој во јавноста често изнесува ставови со кои го негира македонскиот идентитет.
Во објава на Фејсбук, Земон соопшти дека поднесува оставка со цел, како што наведе, да не му наштети на угледот на партијата.
„Сакајќи да го заштитам угледот на СДСМ од непринципиелните напади кон мене, а со тоа, не бирајќи средства, да го инволвираат и моето семејство, а со цел да не бидам товар на борбата на партијата кон уривањето на оваа власт, поднесувам оставка од местото член на ИО на СДСМ“, објави Земон.
Оставката следува по неговата средба во Софија, која предизвика бројни политички реакции и критики во јавноста.
