На 12 вработени, воспитувачки, негувателки, стручни соработници и помошно-технички персонал од градинките во Општина Центар денеска им беа врачени награди за нивната исклучителна посветеност, грижа и ангажман во воспитувањето и развојот на најмладите.
Градоначалникот на Општина Центар, Горан Герасимовски при доделувањето на наградите нагласи дека овие награди ќе бидат дополнителен поттик во нивната благородна мисија.
– Вие сте темелот врз кој се гради секое детство. Во градинките се стекнуваат првите навики, првите другарства и првите вредности. Вашата улога е исклучително одговорна, затоа што токму од вас започнува развојот на секое дете. Се надевам дека овие награди ќе бидат дополнителен поттик во вашата благородна мисија – порача Герасимовски на свечената приредба во ЈУДГ ОЦ „13 Ноември“.
Тој истакна дека Општина Центар континуирано вложува во градинките и училиштата, проширување на капацитетите и подобрување на условите.
– Ја изградивме најсовремената градинка во државата „Пролет“, а во нашата програма предвидена е изградба и на уште една нова градинка кај Клиничкиот центар – истакна Герасимовски.
Оваа година, Општина Центар ја зголемила вредноста на наградите за 30 проценти, од 30.000 на 45.000 денари, со цел, како што се посочува во соопштението, дополнително да ги мотивира и вреднува кадрите кои секојдневно вложуваат труд, грижа и посветеност во развојот и воспитувањето на децата.
