Општина Брвеница и албанската погранична Општина Булќиза, чие седиште е на на 27 километри од Дебар, за време на вчерашната посета на делегација на Општина Брвеница на Булќиза, потпишаа Меморандум за соработка со цел зајакнување на меѓуопштинските и прекуграничните односи.
-На средбата, која се одржа во пријателска и конструктивна атмосфера, претставниците на двете општини разговараа за можностите за продлабочување на соработката во повеќе области од заеднички интерес, со посебен акцент на аплицирањето и реализацијата на заеднички проекти во рамките на ИПА и ИПАРД програмите, објавија градоначалниците на двете општини.
Градоначалникот на Општина Брвеница, Јовица Илиевски упатил искрена благодарност до Општина Булќиза и градоначалничката Фестиме Мјештри за топлиот пречек, гостопримството и покажаната подготвеност за партнерска соработка.
Оцениле дека потпишувањето на Меморандумот претставува значаен чекор кон унапредување на локалниот и регионалниот развој, како и кон зајакнување на пријателските односи меѓу двете општини.
Од двете страни било изразено уверување дека воспоставената соработка ќе резултира со конкретни проекти и активности кои ќе придонесат за подобрување на условите за живот на граѓаните и развој на локалните заедници.
На територијата на Општина Булќиза припаѓаат и административните единици Острени и Требиште, област Голо Брдо, населени главно со Македонци.
