Институтот за меѓународни, стратегиски и безбедносни студии „Радика“ организира јавна трибина на тема „Држава за сите или плен за малкумина – може ли Македонија да ја победи корупцијата?” Во дискусијата, како што е најавено, ќе се вклучат експерти, членови на дипломатскиот кор, претставници на академската заедница и на цивилното општество, за да се развие расправа за корупцијата во Македонија.
Воведни обраќања ќе имаат универзитетскиот професор, Миодраг Лабовиќ и поранешниот министер за финансии, Кирил Миноски, а трибината ќе ја отвори и модерира Ивица Боцевски, поранешен заменик премиер за европски прашања.
-Дискусијата ќе опфати неколку прашања од посебна важност за борбата против корупцијата, вклучувајќи: Дали институциите се независни или зависни од партиските центри на моќ?
Дали антикорупциските механизми функционираат или се декларативни? Дали постои селективна правда во Македонија? Дали сме заглавени во вечна потрага за нов модел за институционална борба против корупцијата? Колку корупцијата ја чини македонската економија? Како да се создаде култура на отчетност? и Како да се воспостави реална политичка одговорност?, информираат од „Радика“.
