Потпретседателот на Собранието Јован Митрески, оствари средба со потпретседателот на Собранието на Црна Гора, Никола Цамај, на која беше потврдена добрата и пријателска соработка меѓу двете земји, како и важноста од понатамошно унапредување на меѓусоседските односи.
На средбата, како што информираат од собраниската прес-служба, потпретседателот Митрески ја истакна значајната улога на опозицијата во едно демократско општество, нагласувајќи дека сите политички чинители треба заеднички да работат во интерес на граѓаните и развојот на општеството, независно од етничката, верската или политичката припадност.
Соговорниците разговараа и за актуелните предизвици поврзани со измените на Изборниот законик, правичната застапеност на жените и мажите во претставничкиот дом, како и за процесот на евроинтеграција на државата. Во разговорот беше отворено и прашањето за односите со Бугарија, при што беше нагласено дека долгото чекање за членство во Европската Унија придонесува за зголемување на евроскептицизмот, како и за одливот на младите, високообразованите и квалификуваните кадри од државата.
Потпретседателот Митрески упати честитки за напредокот на Црна Гора на патот кон Европската Унија и побара поддршка за евроинтегративниот процес на Македонија.
Двајцата соговорници се согласија дека парламентарната соработка и активностите на групите за соработка меѓу двата парламента имаат особено значење и треба дополнително да се интензивираат, особено во делот на размена на искуства и добри практики поврзани со евроинтегративниот процес.
