Фондацијата Конрад Аденауер (КАС) денеска организира конференција „Бизнис со интегритет за конкурентна економија“ на која ќе биде отворена темата за сѐ поголемото значење на интегритетот, транспарентноста и усогласеноста, како предуслови за успешна и конкурентна економија.
Конференцијата ќе понуди практични согледувања за тоа како етичкото и одговорно работење придонесува за намалување на коруптивните ризици, гради доверба и отвора нови можности за развој, пристап до пазари и партнерства, вклучително и соработка со странски компании кои сѐ повеќе ги вреднуваат стандардите за интегритет кај домашните МСП.
Ќе присуствуваат високи претставници од институциите, меѓународната заедница и бизнис-секторот, а најавени се обраќања на Павел Усватов, директор на Програмата за владеење на правото, КАС Југоисточна Европа, германската амбасадорка Петра Дрекслер и заменикот-шеф на Делегацијата на Европската Унија, Бен Нупнау.
Како интегритетот и транспарентните бизнис практики ја зајакнуваат конкурентноста на МСП, ја зголемуваат довербата и го подобруваат деловното опкружување, е тема на панел-дискусијата на која, како што е најавено, ќе учествуваат заменик-претседател на Влада и министер за транспорт Александар Николоски, претседателот на ДКСК Адем Чучуљ, претседателот на Стопанската комора, Бранко Азески, претседаталката на Асоцијацијата на бизнис жени Валентина Дисоска, како и финанскиот менаџер и офицер за усогласеност во Маркарт Македонија, Снежана Здравеска.
Конференцијата се организира во рамки на ЕУ кофинансираниот проект „Бизнис со интегритет Северна Македонија – Мобилизирање на малите и средните претпријатија (МСП) како лидери против корупција“.
