Делегација на Општина Борнова, Република Турција, предводена од заменик-градоначалничката, Дујгу Болук, која престојува во посета на Општина Маврово и Ростуше, оствари средба со градоначалникот Онер Јакупоски, како и со членовите на општинскиот совет.
-Посетата на високата делегација од регионот на Измир претставува значаен чекор напред во продлабочувањето на соработката помеѓу двете општини. Во текот на средбата, која помина во срдечна и конструктивна атмосфера, беа разменети искуства за функционирањето на локалните самоуправи а беа разгледани можностите за идна заедничка реализација на проекти од јавен интерес, информираа од Општината.
На средбите била нагласена потребата од интензивирање на меѓусебната соработка во области за што постои голем потенцијал, како, како што се културата и традицијата, економијата и туризмот, како и реализација на иницијативи за поврзување на учениците и младите преку образовни и спортски активности.
-За нас пријателството со Република Турција и конкретно со Општина Борнова е од исклучително значење. Нашите врски се многу подлабоки од обична административна соработка, тие се темелат на заедничка историја, вредности и искрена почит. Денеска потврдивме дека сме подготвени да преминеме во фаза на поактивна соработка, која ќе донесе конкретни придобивки за нашите жители, посочи градоначалникот Јакупоски.
Заменик-градоначалничката на Борнова, Болук, изрази голема благодарност за топлото гостопримство и ја истакна подготвеноста на нејзината општина да ги отвори вратите за понатамошни заеднички иницијативи.
Таа потенцираше дека Маврово и Ростуше со својата уникатна природа и гостопримливост, претставуваат инспиративен партнер за Општина Борнова, чија делегација присуствуваше и на вчерашната свеченост по повод одбележувањето на денот на Општина Маврово и Ростуше.
