Независниот академски синдикат (НАкС) вечер од 18 часот на Институтот за хемија при Природно-математички факултет – Скопје организира дебата за претставување на кандидатите за ректор на Универзитетот „Св. Кирил и Методиј“ во Скопје, за мандатниот период 16 септември 2026 – 15 септември 2029.
Изборите за ректор на УКИМ ќе се одржат на 28 април, со тајно гласање на сите единици во состав на Универзитетот. Во трка за ректор се проф. д-р Дарко Данев од Машинскиот факултет и проф. д-р Биљана Ангелова, актуелна ректорка на УКИМ, која е кадар на Економскиот институт.
Во пресрет на изборите НАкС ја организира дебата на која, како што соопшти, присуство потврдил кандидатот проф. д-р Дарко Данев.
-Поради веќе преземени обврски, поканата за дебата не ја прифати кандидатката за реизбор, проф. д-р Билјана Ангелова – информира Независниот академски синдикат.
НАкС соопшти дека дебатата ја организира за да овозможи „простор за подлабоко запознавање на кандидатите за ректор, како и аргументирана дискусија за нивните насоки и определби“.
-Идниот ректор треба да ги трасира политиките и развојот на универзитетот во време на глобални економски и политички предизвици, како и во време на забрзано навлегување на вештачката интелигенција во секоја пора од општеството. Овој избор воедно се врши во период на законски реформи на високото образование и науката, кои ќе имаат големо влијание врз работата на Универзитетот и неговите единици, наведува синдикатот.
На дебатата се поканети сите членови на научниот, научно-наставниот, административниот кадар на УКИМ, неговите студенти и заинтересирани страни. По претставувањето ќе следува отворена дискусија и прашања од публиката. Модератор на дебатата ќе биде проф. д-р Виктор Стефов од Институтот за хемија.
