Во одредени маркети некои основни производи поскапеле и над 10% од 1-ви февруари до 1-ви април, но просекот е раст од само 0,4%. Некои производи биле и со намалени цени. Ова го покажа анализата на Министерството за економија на 55 производи во 4-те супермаркети Кам, Зур, Кипер и Веро. Мерки ќе има за да поевтинат производите кои поскапеле најмногу – најави премиерот Мицкоски. Сепак, трговците се чини не пробувале да заработат неосновано на грбот на граѓаните. Нивните профитни маржи биле намалени за два месеци, односно сега се нешто под 15%.
„Тие се намалени споредено со 1 февруари на 1 април. Ако на 1 февруари просечните профитни маржи биле нешто над 15% според нашите калкулации, според дистрибутерите и ланците не е таа бројка, но според нашата бројка зборувам, сега се под 15%, мислам дека се некаде околу 14,7%, повторно ќе кажам според нашата математика. Така што во моментот размислуваме како да дојдеме до поевтини цени за граѓаните, за одредена група на производи каде што имаме двоцифрен број проценти зголемување“ – вели Христијан Мицкоски – претседател на Влада.
Анализата покажала дека најголем скок во цените има кај хигиенските производи од 1,42 насто, а кај маслото за јадење, сирењето и јајцата зголемувањето е за 0,45 проценти. Според извештајот, намалување на цените има кај овошјето, зеленчукот и безалкохолните пијалаци.
Инаку премиерот очекува цените на горивата следната недела да останат исти или пак да се намалат. Владата одлучи да ја продолжи кризната состојба за уште нови две недели. Мицкоски нагласи дека ќе има нова седница на која ќе се одлучува да се задржи ДДВ на горивата на 10 отсто. Тој рече дека се следат цените на нафтата на берзите и врз основа на нив ќе се утврдува и висината на намалувањето на акцизата. Исто така, Владата преговара и да се издејствува дополнителен денар попуст од Окта, од сегашните 3 денари за дизелот и 2 денари за бензините по литар.
Нафтените резерви остануваат стабилни на нивото за покривање на 62 дена. Од стартот на кризата не е потрошен ниту еден литар од нив. Снабдувањето е стабилно, а потрошувачката е зголемена на повеќе од два милиони литри дневно, главно бидејќи граѓаните од соседните држави точат горива во Македонија која има убедливо најниски цени на бензините на Балканот.
