Ако сте непушач, а сакате да отидете на вечера во некој ресторан или кафеана, газдата ќе мора да ви обезбеди влез, кој е целосно одвоен од просторот каде што се пуши. Ова е предвидено со новиот предлог – закон за пушење, за кој министерот за здравство Алиу објасни дека го има сработено тим на експерти од здравството, а во предвид ги земале забелешките на сите инволвирани страни, како од угостителската, така и од тутунарската индустрија.
„Една од најголемите, ајде да кажеме, инфраструктурни зафати кои што треба да ги имаат сите бизниси кои се занимаваат со ваков тип на услуги, ќе мора, значи со закон ќе мора да направат влез во самиот угостителски објект кој што е одвоен од просторот каде што се пуши“, изјави Азир Алиу, министер за здравство.
Целта на новиот закон е да се заштитат граѓаните кои се непушачи, а во исто време да им се одреди место на оние коишто пушат, објаснува Алиу. Според новите предлози, пушење ќе биде дозволено на тераси со најмалку две отворени страни или со отворен кров. Во Скопје досега има околу 7000 угостителски објекти и за поголемиот дел од нив е речиси невозможно да беобезбедат трет отвор како што првично беше планирано.
„На пример, во аголни и така натаму, кои што од едната и од другата страна имате објекти коишто вие не можете да срушите објект за да имате три страни отворени. Ние затоа ставивме во законот да може и кровот да биде отворен и да се третира, бидејќи се докажа дека со третирање и на кровот како отворена страна, воздухот за неколку секунди се чисти“, изјави Азир Алиу, министер за здравство.
Предлог – законот на 24 март, во вторник ќе биде ставен на седница на Влада, а до почетокот на мај се очекува да биде процесуиран во Собранието. Законот првично беше најавен дека ќе почне да се применува од 1 март, но беше одложен поради реакции и забелешки од граѓаните, угостителите и тутунската индустрија.
