Во насока на унапредување на меѓуинституционалната соработка и продлабочување на стручниот дијалог за уставно-правни прашања, Уставниот суд на Македонија и Академијата за судии и јавни обвинители „Павел Шатев“ денеска ќе склучат меморандум за соработка.
Како што информираат од Уставниот суд, меморандумот се склучува со цел да се воспостави и унапреди соработката, да се овозможи размена на знаења и искуства, како и зајакнување на институционалните капацитети.
Со овој документ двете институции ја потврдуваат својата заложба за продлабочување на стручната едукација и унапредување на разбирањето на уставната рамка, заштитата на уставноста и законитоста и развојот на современи институционални стандарди.
Од Уставниот суд посочуваат дека соработката ќе придонесе за континуирана стручна соработка и за унапредување на уставно-правните институционални прашања, кои се од значење за правниот поредок и демократскиот развој на државата.
