Владина делегација, предводена од заменик-претседателот на Владата и министер за транспорт, Александар Николоски, денес и утре престојува во работна посета на Париз, каде остварува средби со високи претставници на УНЕСКО.
На средбите ќе бидат истакнати заложбите на Владата за зачувување на статусот на природното и културното наследство на Охридскиот Регион, како и воспоставувањето систем за заштита кој гарантира интегритет и автентичност на ова подрачје како исклучителна универзална вредност. Делегацијата ќе разговара и за мерките што се преземаат за спроведување на препораките од реактивните мисии на УНЕСКО од 2020 и 2024 година, како и за реализација на стратегискиот план за рехабилитација.
Во рамки на посетата се планирани средби со генералниот директор на УНЕСКО, Калед Ел-Енани, како и со повеќе високи претставници на организацијата. Во составот на делегацијата се и министерот за надворешни работи и надворешна трговија, Тимчо Муцунски; министерот за култура и туризам, Зоран Љутков; министерот за животна средина и просторно планирање, Муамет Хоџа; градоначалникот на Општина Охрид, Кирил Пецаков и градоначалникот на Општина Струга, Менди Ќира.
