„Срам и пари“ (Shame and money) во режија на Висар Морина ја освои големата награда на жирито – World cinema grand jury prize: Dramatic, на годинешното издание на филмскиот фестивал „Санденс“, соопштија денеска од екипата.
Филмот е реализиран како копродукција помеѓу Германија, Косово, Северна Македонија, Словенија, Албанија и Белгија. Македонски копродуцент е Марија Димитрова со „Лист продукција“ од Скопје, а со поддршка од Агенцијата за филм на Македонија.
– „Срам и пари“ беше дел од натпреварувачката категорија World cinema dramatic competition на фестивалот, што оваа година за последен пат се одржува во Парк Сити – Јута, САД, од 22 до 31 јанаури, пред да биде преселен во Болдер, Колорадо, каде што ќе се одржува од идната година. Филмот ја следи приказната на Хатиџе и Шабан – брачен пар во своите 40-ти години, кои со своето пошироко семејство живеат на фарма во рурално Косово. По семејниот спор, начинот за нивна егзистенција на село е оневозможен, а тие се принудени да се преселат во Приштина. Соочени со притисокот да најдат работа и место за престој за да може да се грижат за своето семејство, за Хатиџе и Шабан почнува истоштувачко патување низ суровото хиперкапиталистичко општество – наведоа во соопштението.
Главните улоги ги играат Астрит Кабаши, Флоња Кодели, Кумрије Хоџа, Фиона Главица и Албан Укај, а сценариото е на Висар Морина и Дорунтина Баша.
Македонската екипа ја сочинуваат Марија Димитрова – копродуцент, актерите Теута Ајдини и Рефет Абази, тон-мајсторот Игор Поповски, микроманот Дарко Бошковски, мајсторот на светло Костадин Дончев, мајсторот на сцена Трајче Величковски и координаторот на продукција Александар Атанасов.
– „Срам и пари“ се најде и на листите за најдобрите филмови на „Санденс 2026“ на „Холивуд рипортер“ и на „Вараети“ заедно со хит филмовите на фестивалот, како The invite, I want your sex, Josephine, Leviticus, Wicker, а доби и голем број позитивни критики во другите гласила за филм – се истакнува во соопштението.
