Вицепремиерот и министер за транспорт Александар Николски вечерва изјави дека има проект за автопат или експресен пат Романовце – Страцин, завршена е експропријацијата и, како што рече, комплетно сме спремни од наша страна и само се чекаат средства од ЕУ за делницата која е дел од Планот за раст.
Николоски во госстувањето на една од националните телевизии информира дека ЕУ создаде План за раст во кој, како што рече, има обврски за Македонија и обврски за ЕУ.
-Обврските Македонија релативно добро ги завршува, најдобро од сите земји од регионот. Тоа го потврдуваат од ЕУ. Обврските на ЕУ некако малку ги поместија. Автопатот или експресниот пат Романовце – Страцин е дел од Планот за раст, кој треба да го финансира ЕУ, но до денес за жал се уште нема активности. Ние за да не сме непристојни, неодговорни ќе почекаме уште некое време, но не можеме вечно да чекаме зошто граѓаните не смеат да чекаат. Стратешки е битно ние автопатски или со експресен пат да се поврземе целосно со Бугарија, рече Николоски.
Тој вели дека има проект за оваа делница, завршена е експропријација и, како што рече, комплетно сме спремни од наша страна и се чекаат средства од ЕУ.
– Уште некое време ќе почекаме. Не мислам на десетици години, туку на неколку месеци максимум до една година. Ако тргне проектот на тој начин одлично, а ако не ќе бараме други извори на финансирање. Да е јасно за граѓаните, Планот за раст во најмал дел е грант, зборуваме за кредити. Овие проекти главно се финансираат од кредити. Ако кредитот е преку Планот за раст одлично, а ако не ќе бараме други кредити, појасни Николоски.
