Првиот заменик-претседател на Владата и министер за европски прашања Беким Сали денеска оствари средба со шпанскиот амбасадор Рафаел Соријано Ортиз, на која биле разгледани блиските билатерални односи меѓу Македонија и Шпанија, како и можностите за нивно понатамошно унапредување во повеќе области, вклучувајќи ја европската политика, економијата, образованието и културата.
Посебен акцент, како што информираат од Министерството за европски прашања, бил ставен на евроинтеграцискиот процес на Македонија, при што била нагласена важноста од континуиран напредок во спроведувањето на реформите и исполнувањето на европските критериуми.
Во таа насока, била дискутирана и тековната реформска агенда насочена кон зајакнување на институциите, зголемување на транспарентноста и подобрување на инвестициската клима, како предуслов за приближување кон стандардите на Европската унија.
Двете страни изразиле заедничка подготвеност за продлабочување на соработката и натамошно јакнење на стратешките односи меѓу Македонија и Кралството Шпанија.
