Набавка на дрон специјализиран за мерење на квалитетот на воздухот, вработување на 5 инспектори за животна средина, техничка и теренска ревизија на сите издадени „А“ и „Б“ дозволи, како и сите постоечки елаборати за заштита на животната средина, зголемен буџет за заштита на животната средина, обезбедување материјални средства за 100 проби во акредитирана лабораторија, поставување камери на дивите депонии и јавно објавување и отчет за работата на инспекторите во општината, побараа од денешниот протест против аерозагадувањето од Здружението „Здрава котлина“, кој се одржа во центарот на градот пред крстосницата на ТЦ „Глобал“ во Струмица.
Покрај тоа, од сите пратеници од струмичко во Собранието побараа да поднесат иницијатива за итна измена на Законот за индустриски емисии со бришење на деловите каде се дозволува деловна тајна за процесите на емисија, законска можност за загадување повеќе од дозволеното, како и вметнување на обврската за сите „А“ и „Б“ интегрирани еколошки дозволи за воспоставување автоматски континуиран мониторинг со постојана видливост на резултатите.
-Ако овие наши барања не се исполнат во најкус можен рок, ќе продолжиме со протести и блокади се до остварувањето на нашите барања. Струмица има право да дише. Сакаме чист воздух, порача Оливера Аризанова Мансбарт од „Здрава котлина“.
Пред насобраните граѓани се обратија повеќе активисти и граѓани, кои алармираа за состојбите со аерозагадувањето во Струмица, притоа потенцирајќи дека едвај педесетина денови во годината градот не е загаден и дека постојано ги зазема највисоките места во домашните и европските мерења по загаденост.
Денешниот протест се одржа под мотото „Излези. Застани. Зборувај за себе. За своите деца. За здравјето. За иднината“.
Инаку, „Здрава котлина“ и лани во февруари и јули организираше протести против аерозагадувањето.
