Нема веќе доживотни функции и недопирливи позиции во државната администрација. Мерит системот станува правило, а не исклучок. Со новиот предлог закон за високи раководители на органите на државната управа и фондовите, за првпат се воспоставува систем со јасна рамка за тоа кој, како и под кои услови ќе може да ги води клучните институции во Македонија. Законот опфаќа 19 министерства, без МВР, 48 органи во состав на министерствата, 29 самостојни органи на државната управа и три фондови. Воспоставена е јасна рамка за времетраењето на мандатот на високите раководители кое по правило изнесува четири години, но не смее да биде помалку од две, а повеќе од пет години на функцијата. Едно лице не може да биде висок раководител повеќе од два пати последователно. Целта како што нагласи министерот за администрација Минчев, е професионализација на администрацијата, ограничување на политичките влијание и избор на раководители според знаењето, резултатите и одговорноста.
Прв пат се воспоставува единствена, јасна и системска рамка за именувањето, мандатот, одговорноста и разрешувањето на највисоките раководни позиции во администрацијата. Воведуваме појасни и унифицирани критериуми за избор на директори, државни секретари и членови на колегијални органи на државната управа, но и за членови на управни одбори за кои досега не постоеја речиси никакви правила, подвлече Горан Минчев, министер за јавна администрација.
Со новиот предлог закон не се предвидени формирање на нови институции и органи, а нема да има импликации и по буџетот, статусот В.Д. станува строго временски и правно ограничен..
„Функциите на високите раководители треба и мора да се достапни за сите заинтересирани кандидати под еднакви услови. Именувањето висок раководител е предвидено да се врши во транспарентна, фер и конкурентна постапка за селекција, со што се гарантира изборот на најуспешниот и најдобар кандидат, истакна Игор Јанушев, генерален секретар на Владата.
Предлог-законот за високите раководители на органите на државната управа и фондовите од 31 декември е објавен на платформата ЕНЕР, каде што јавноста може да доставува свои забелешки и предлози.
