Собранието ја започна постапката за избор на државен обвинител. Во наредните 15 дена, јавните обвинители и кривичните судии кои се заинтересирани за оваа клучна позиција во судството, имаат можност да се пријават на огласот објавен во Службен весник. Огласот трае до 26 јануари, а кандидатите пријавите треба да ги достават до Парламентот.
На огласот можат да се пријават само оние кои имаат најмалку 10 години непрекинат стаж како судии или обвинители во кривичната област. Не е важно дали моментално се на функција, важно е да го имаат тоа искуство. Покрај овој посебен критериум, кандидатите треба да ги исполнуваат и општите услови.
За Јавен обвинител на Република Северна Македонија може да биде именувано лице кое ги исполнува општите услови утврдени во членот 61 од Законот за јавното обвинителство и тоа:
– да е државјанин на Република Северна Македонија,
– активно да го владее македонскиот јазик,
– да има деловна способност,
– да има завршени правни студии со стекнати 300 ЕКТС или VII/1 степен на образование од областа на правните науки или нострифицирана диплома од правни студии во странство за стекнати 300 кредити
– да има положено правосуден испит во Република Северна Македонија.
Советот на јавни обвинители, откако ќе заврши огласот има рок од 15 дена да даде позитивно или негативно мислење за пријавените, а ако не испрати мислење навреме, рокот се продолжува уште 15 дена, по што се смета дека мислењето е позитивно. Потоа, Владата го доставува предлогот до Собранието за именување на кандидатите кои добиле зелено светло од Советот, а ако нема такви, Собранието ќе распише нов оглас.
Жешкото столче на државниот обвинител, една недела пред Нова година го пополни обвинителката Анита Тополова-Исајловска. Советот на јавни обвинители ја избра за вршител на должноста, по неговата оставка. Таа беше единствен кандидат и пред да виде избрана, ја извршуваше функцијата заменик државен јавен обвинител.
Љупчо Коцевски самиот си поднесе оставка откако Собранието на седница го стави неговото разрешување. Тој ќе биде запаметен како единствен јавен обвинител на кого му е изгласана недоверба, но исто така е и првиот функционер кој не е сменет од оваа позиција, по промената на власта.
