Кучиња скитници се почесто можат да се забележат во опасна близина на скопјани. Глутници масовно се појавуваат во скопските населби, неретко се агресивни и напаѓаат случајни минувачи. Статистиките на МВР, одат во правец на потврда на поплаките на граѓаните дека се почесто станува опасно да се излезе на улица. Во последните 3 месеци на територијата на Скопје 189 граѓани пријавиле дека биле нападнати од куче скитник, а најалармантно е во општините Гази Баба и Аеродром со 46 односно 39 пријави. Мислењата на граѓаните се поделени. За едни кучињата предизвикуваат страв при секоја прошетка, а за други, овие животни заслужуваат заштита и хуманост. Дел бараат нивно отстранување од скопските улици, а други пак, сметаат дека проблемот не е во кучињата, туку во надлежните институции.
„Има, лаат, но не касаат. И тие сакаат да живеат, не треба да се убиваат. Институциите треба да превземат нешто за кучињата скитници, треба да има центри за згрижување, сепак сме луѓе и треба да бидеме и хумани према нив“– велат граѓаните.
Од ЈП „Лајка“ велат дека причната за појавата на глутниците е тоа што масовно и организирано со комбиња се носат кучиња од други градови и се истовараат во општините во Скопје. Тие ќе поднесат пријава до Министерството за внатрешни работи за да се преземат посериозни мерки бидејќи јавното претпријатие нема доволно капацитети за да ги згрижи сите кучиња.
„Станува збор за нестерилизирани и необележани кучиња, што јасно укажува дека ова не може да биде природен прираст, туку насилна дислокација. Јавно и одговорно тврдиме дека станува збор за организирано внесување кучиња, затоа што ЈП ‘Лајка‘ нема оставено, ниту пак има испуштено ваква бројка нестерилизирани и необележани животни на ниту една локација во Скопје.“- велат од ЈП „Лајка“.
Од здружението за заштита на животни „Анима Мунди“ исто така тврдат дека се работи за организирано внесување на кучиња на територијата на град Скопје. Тие апелираат до МВР и Јавното обвинителство да спроведат истрага проследена со итни мерки и казни за сторителите.
„Бараме измена на законската рамка. Поднесовме конкретни предлози за измени на Законот за заштита и благосостојба на животните, со кои бараме најстрого регулирање на сопствеништвото на кучиња, како и предлог-измени на Кривичниот законик со кои напуштањето миленик, суровоста и предизвикувањето општа опасност ќе се третираат како кривични дела, по примерот на Република Хрватска“– велат од „Анима Мунди“.
Викендов, во општина Карпош била донесена глутница од над 20 кучиња, кои не се чипирани и стерилизирани. Од нив досега се заловени 19 кучиња, но екипите продолжуваат да работат за да ги разбијат глутниците и да ги чипираат кучињата. Од Анима Мунди додаваат дека на терен биле пронајдени и кучиња со ушни маркици од република Албанија, што создава сомнежи за прекуграничен транспорт на животните.
