Ветровитиот Штип, викендов се најде на листата на градови со загаден воздух, откако мерните станици регистрирале зголемени концентрации на ПМ честички над дозволеното. Според податоците од Лабораторијата за животна и работна средина „Амбикон“, при УГД, годинава веќе е надминат дозволениот број денови со пречекорување на граничните вредности. И покрај тоа, Штип и натаму останува меѓу почистите градови во државата според просечниот квалитет на воздухот.
„Граничната вредност на дозволените денови со пречекорување е 35, а во Штип веќе имаме 41 ден со тие надминувања на концентрациите. Мислам дека и претходната година имавме надминување, меѓутоа просечната концентрација е многу пониска и е во рамки на дозволените вредности“, изјави Бобан Самарџиски, од Лабораторијата Амбикон, при УГД – Штип.
Како една од главните причини за загадувањето, експертите го посочуваат затоплувањето со дрва, кое значително ги зголемува концентрациите на ПМ честички, а дополнително влошување на квалитетот на воздухот предизвикува и временската состојба, објаснуваат од Амбикон.
„Немаме струење на воздухот, односно се јавува температурна инверзија и со нејзина појава топлиот воздух се наоѓа погоре, а ладниот воздух долу и со тоа маглата го притиска воздухот и се создаваат уште повисоки концентрации“, изјави Бобан Самарџиски, од Лабораторијата Амбикон, при УГД – Штип.
Идентична била состојбата и во Делчево, каде пред три месеци е поставена мерна станица. И таму биле регистрирани зголемени концентрации на ПМ честички. Лекарите апелираат граѓаните, особено хронично болните, децата и повозрасните, да избегнуваат подолг престој на отворено, како и да ги следат препораките за заштита од загадениот воздух.
