Министерството за внатрешни работи соопшти дека од денеска граѓаните ќе можат да поднесуваат барања за промена на контакт-податоците поврзани со регистрацијата на нивните возила. Постапката ќе се врши на посебен шалтер во Одделот за граѓански работи, во зградата на МТВ во Скопје, секој работен ден од 08:00 до 17:00 часот.
Граѓаните ќе можат да ги коригираат податоците во случај на промена или доколку добиле известување со неточни информации. Промените ќе можат да се извршат и низ станиците за технички преглед во државата, каде што е распореден деташиран референт на МВР.
Воедно, МВР отвори и електронски канал за комуникација, односно мејл-адреса, преку која граѓаните ќе можат да испраќаат забелешки, нејаснотии и прашања поврзани со функционирањето на системот „Безбеден град“.
