Околу педесет барања за обештетување од неодамнешната поплава во неколку села во Чешиново-Облешево, се доставени до Локалната самоуправа. Најголем дел од пријавените штети се за поплавени земјоделски површини, неожнеан ориз, подруми, бунарски системи. Од денеска општинската комисија за проценка на штети, излегува на терен за да изврши увид, по што извештајот ќе биде доставен до надлежните институции и министерства.
„Ние имаме формирано комисија за проценка на штети и нејзината задача е да го подготви списокот со штети кои подоцна ќе биде доставен до соодветните институции и министерства. Очекуваме дека ќе излезат со нивна проценка во однос на тоа колку ќе ги обештат луѓето„ изјави Јорданчо Костадинов, градоначалникот на Чешиново-Облешево
Надојдената вода направи штета и на патната инфраструктура. Поткопани се темели на два помали моста за кои ќе се бара итна санација. Критично беше во Облешево, Спанчево, Чифлик и Чешиново, каде освен поплавени дворови, уништени се и големи количини на ориз.
„Навистина беше лошо, двроровите ни беа како езеро. Голем дел од нивите со ориз, од другата страна на пругата не можат да се ожнеат„ велат жителите на Чешиново-Облешево.
Земјоделците посочуваат дека покрај обилните врнежи од дожд, причина за поплавата се и неисчистените канали, затоа што ова не е првпат нивните села да бидат поплавени.
