Основното јавно обвинителство Кавадарци поднесе обвинение против три лица поради закани упатени кон градоначалникот на Кавадарци. Првообвинетиот се товари за продолжено ширење расистички и ксенофобичен материјал по пат на компјутерски систем (член 394-г), како и за загрозување на сигурноста (член 144). Второ- и третообвинетиот се товарат за загрозување на сигурноста.
Според обвинителството, првообвинетиот подолг период на својот Фејсбук-профил објавувал содржини со говор на омраза, навреди, повици за насилство и смртни закани насочени кон градоначалникот, поттикнувајќи омраза по политичка припадност и општествен статус. Тој објавувал и фотографии од оштетениот и неговите малолетни деца, при што се заканувал и кон нив. Дополнително, на социјалните мрежи споделувал видеа во кои пукал со автоматска пушка и пиштол.
Од јули годинава, како што стои во обвинението, започнал и телефонски – преку повици и пораки – директно да му се заканува на градоначалникот и неговото семејство.
Второобвинетиот дел од заканите телефонски ги пренесувал во име на првиот обвинет, додека третообвинетиот коментирал под Фејсбук-објавите, упатувајќи закани со убиство кон градоначалникот.
Обвинителството утврдило дека кај првообвинетиот, кој има и македонско и бугарско државјанство, постои опасност од бегство, но и ризик да ги реализира заканите, па до Основниот суд во Кавадарци поднесе посебен предлог за определување мерка притвор.
