Домот за стари лица „Зафир Сајто“ во Куманово во моментов работи со речиси целосно искористен капацитет, информираа денеска налдежните од установата. Во домот моментално се сместени 162 корисници, што е речиси целосно исполнет капцитет.
-Секогаш има заинтересирани за сместување. Поради искористениот капацитет, обично периодот на чекање изнесува од месец и половина до два месеци. Апелираме до семејствата на корисниците да бидат трпеливи, затоа што барањата ги разгледуваме според редоследот и можностите што ни се на располагање, изјави Дејан Стојановски.
Податоците укажуваат дека овие установи сè повеќе стануваат потреба и во Македонија која го следи европскиот тренд со процесите на стареење на населението и демографската слика во државата. Месечниот надомест за престој и грижа во домот се движи од 16.000 до 18.000 денари, во зависност од здравствената состојба и потребите на корисникот. Домот инвестира во подобрување на условите со средства од сопствени приходи. Во тек е реконструкција на подрумските простории, кои целосно ќе се пренаменат, а истовремено се врши и дополнително опремување на одредени простории.
-Со сопствени средства, во износ од околу 600 илјади денари, целосно ги реконструираме подрумските простории, кои ќе добијат нова намена, наменета за потребите на техничкиот персонал, таму е и коталара, бидејќи установата се загрева на гас, вели Стојановски.
Овие вложувања покажуваат дека установата настојува да одговори на потребите на корисниците. Од 17 до 23 ноември 2025 година, во Домот се одбележува Неделата на грижа за старите лица, со повеќе активности насочени кон подигнување на свеста за потребата од внимание, почит и човечка топлина кон повозрасните. Меѓу активностите беше и посетата од ученици од петто одделение од ООУ „Браќа Миладиновци“ од Куманово, кои придонесоа со дружење и непосреден контакт со корисниците.
-Со оваа недела сакаме да потсетиме дека грижата за старите лица не е само институционална, туку општествена обврска. Топла насмевка, краток разговор или мала помош значат многу. Грижата за старите лица е огледало на човечноста на едно општество, изјави Стојановски.
Во рамки на одбележувањето, вработените и дел од корисниците подготвија слатки, симболичен гест со кој беше истакната важноста на заедничките активности, чувството на припадност и меѓусебната поддршка.
