Сатеска, Коселска, Черава – повеќе реки се излеаа од коритата – освен во југозападниот дел од Македонија, според прогнозите зголемување на водостојот ќе има и во струмичкиот регион. Таму се очекува да падне големо количиство дожд во текот на денот. Има одредени излевања, поплавени објекти и одрони, но засега состојбата е под контрола.
Голема количина дожд падна во Охридскиот регион и се поплави патот кој води до селото Орман.
Поради големото количество вода на коловозот, сообраќајот на овој патен правец е отежнат, а на одредени делови се препорачува крајна претпазливост при минување.
Од УХМР постојано го информираат Центарот за управување со кризи за сите нови промени.
Критично изминатото деноноќие било во битолско. Од излевањето на реката Шемница се поплавиле куќа и штали. Вардар е со зголем водостој во горниот тек од реката.
Променливо облачно време со локални обилни врнежи, можни грмежи и силен јужен ветер над 60 km/h – тоа се временските прогнози од УХМР за до крајот на денот. Пад на температурите и врнежи од снег на повисоките места се очекува во недела.
Сите надлежни институции се навремено известени од страна на Центарот за управување со кризи за сите овие појави и веќе се преземаат соодветни мерки за санација и заштита на населението и инфраструктурата.
Од ЦУК апелираат до граѓаните да избегнуваат движење во близина на речни корита, мостови и поплавени површини, да ги следат упатствата на надлежните служби, а доколку забележат било каква опасност – веднаш да пријават на бесплатниот број за итни повици 112.
