Започна да се рушат старите и руинирани објекти во Штип. Со градежна механизација се рушат зградите кај хотелот „Гарни“ и поранешното Нервно одделение, каде до вчера живееја ромски семејства кои сега се преселија во новите типски куќи во населбата Мирјанина Црква. Со години овие објекти беа дувло на глувци и отпад, а кај децата и возрасните се ширеше жолтица и шуга.
„Продолжува рушењето на руинираните објекти, овојпат во централното градско подрачје. Долгогодишното барање на жителите на Штип да се уреди еден простор, кој со години наназад беше руиниран, конечно се реализира. Морам да потенцирам дека овде беа сместени ромски семејства кои во меѓувреме добија типски објекти. Денес започнуваме со активност за рушење на овие два објекти“, изјави Иван Јорданов, градоначалник на Штип.
Јорданов најави дека ќе бидат урнати и други руинирани објекти во централното градско подрачје. Дополнително, ќе се спроведе експропријација на земјиште на потегот кон населбата Три Чешми, за продолжување на булеварот „Гоце Делчев“, кој е главен влез и излез на Штип кон Скопје.
„Сакам да најавам и други активности поврзани со рушење на вакви руинирани објекти. Забележувате дека во центарот на градот има повеќе локации кои имаат потреба од урбанизација. Една таква локација е на ЈП ‘Станбен и деловен простор’, за која Општина Штип има покренато иницијатива за уредување, рамнење и рушење на руинираните објекти. Потоа ќе следува и процес на експропријација и изработка на ДУП“, изјави градоначалникот на Штип Иван Јорданов.
Со овој проект Штип го решава деценискиот проблем со запоставените објекти, а истовремено ќе ја подобри урбаната инфраструктура, овозможувајќи модерни услови за развој на градот.
