Со автохтони дрвја ќе се пошумуваат регионите кои лани и ова лето беа пеплосани од огнените стихии. Во расадниците на ЈП „Национални шуми“ веќе се подготвени над 2 милиони зимзелени и листопадни садници со кои треба да се ревитализираат најзагрозените подрачја.
На планината Серта веќе започна пошумувањето, а во тек се анализите за планината Готен, каде што ова лето изгореа над 4.000 хектари.
„Таму сигурно нема да го пошумуваме делот што изгоре ова лето, се чека комисијата да излезе на терен и да ја утврди фактичката состојба. Јас сум сигурен дека таму нема да има дозвола за сеча на поголеми површини. Таму каде што е голо ќе се пошуми. Што се однесува до Серта, таму веќе имаме една сериозна обнова“, изјави, Кире Михаилов, директор на ЈП „Национални шуми“.
Иако ова лето Македонија повторно беше во пламен, штетите по дрвниот фонд, за разлика од минатогодишните пожари, се релативно мали. На Готен и во дојранскиот регион гореа површини со грмушки и слаба деградирана шума, за разлика од претходните години кога огнот буквално за само неколку секунди ја пеплосуваше боровата шума стара десетици години.
„Штетите се многу мали, во однос на пожарот во Малешевијата во 2021. Ако тогаш изгоре висококвалитетна шума, оваа година можеби на целата територија на нашата држава нема толкава штета колку што имаше во 2021 само на тој пожар“, изјави Кире Михаилов, директор на ЈП „Национални шуми“.
Од април до сега, во државата се регистрирани вкупно 2.197 пожари на отворен простор. Најголем дел од нив беа предизвикани од човечки фактор. Според МВР, за овој период досега се поднесени 46 кривични пријави, а уапсени се 66 лица.
