Интензивно се гради новата обиколница во близина на влезот во Штип, во правец кон Радовиш и Струмица. Делницата е веќе трасирана и се асфалтираат двата краци што ќе ги поврзат околните населби. Со нејзиното ставање во функција, двата влеза во градот ќе бидат поврзани, а транзитниот сообраќај ќе се одвива без да се влегува во центарот на градот.
Новата обиколница ќе му даде современа урбанитичка димензија на Штип. Во наредните пет години на тој потег ќе се оформи зона за лесна индустрија и ново населено место во кое свој дом ќе најдат стотина млади семејства.
„За нас како Локална самоуправа е од голем важност да го планираме развојот на нашиот град. Морама централното градско подрачје коешто е загушено од сообраќај да го растеретиме и секаде се овозможи развој и ширење„ изјави Иван Јорданов, градоначалник на Штип.
60-70% од градежните активности се веќе завршени. Според планот, обиколницата во должина од 3,2 километри, во сообраќај ќе биде пуштена средината на наредната година. Околу делницата ќе се изградат паркови, велосипедски патеки, на река Брегалница, нов мост, а се предвидува изградба на уште еден крак .
„Исто така сакам да потенцирам дека ќе се работи и на крак кој ќе ги поврзи населбата „Мерите„ со обиколницата и практично ќе се изгради еден нов кружен тек кај црквата Св. Јован Крстител, која се наоѓа на средина на самата обиколница„ изјави Иван Јорданов, градоначалник на Штип
До крајот на годината ќе бидат завршени и двата резервоара „Пребег„ и „Мерите„ кои се градат во близина на новата обиколница. Со нивната изградба трајно ќе се реши водоснабдувањето на веќе постојните, но и новите населби, што се планираат во тој дел на градот. Истовремено ќе се надмине долгогодишниот проблем со намалениот притисок на вода во повисоките зони на Штип.
