Во Ѓуешево Бугарија конечно беше потпишан договор за Македонија и Бугарија заеднички да го градат меѓуграничниот железнички тунел на Коридорот 8. Параф на документот ставија вицепремиерот Александар Николоски и неговиот бугарски колега Гроздан Караџов. На железничката станица во Ѓуешево, Караџов дојде со воз да го пречека Николоски. Тие се согласија дека изградбата на тунелот ќе значи многу за подобрување на меѓусебните политички и економски односи и ќе значи многу не само за зголемување на трговијата, туку и од безбедносен аспект кога е во прашање НАТО алијансата. Тунелот од граничниот премин Деве Баир до преминот Ѓуешево ќе биде долг 2,4 километри, од кои половина се на македонска страна, а половина на бугарска страна. Во наредниот период работни групи од двете држави ќе ги утврдат деталите и условите за распишување на меѓународен тендер за избор на изведувач на градежните работи. Проектот во целост ќе биде финансиран од Европската Комисија.
Забрзуваат работите на пругата од бугарска страна. Караџов информира дека Бугарија ќе потроши 1,2 милијарди евра за изградба и реконструкција на 4 делници долж Коридорот 8: од граница до Ѓуешево, од Ѓуешево до Ќустендил, од Ќустендил до Перник и од Перник до Софија.
Од Европската Комисија се задоволни што согласноста за заедничка изградба на железничкиот тунел постигната во Брисел се преточува во конкретен договор.
Железничкиот дел од Коридорот 8 во Македонија се гради во три фази. Првата од Куманово до Бељаковце беше пуштена во употреба во јануари годинава. Втората фаза од Бељаковце до Крива Паланка се гради и треба да финишира во октомври 2026та. Николоски вели дека има проблеми со изведувачот, но дека се надева дека тие ќе се решат. Третата фаза од Крива Паланка до граничниот премин Деве Баир е најпредизвикувсчка за изградба поради непристапноста на теренот. До декември треба да биде распишан тендер за избор на изведувач на градежните работи. Вкупната сума за изградба на железницата долж Коридорот 8 во Македонија ќе изнесува најмалку 810 милиони евра.
