Во Пехчево денеска од страна на Општинската изборна комисија беа свечено доделени уверенијата за мандат на градоначалникот Александар Китански и на членовите на Советот на Општина Пехчево. Со ова, официјално почнува новиот мандатен период на локалната власт во општината.
Во своето обраќање, градоначалникот им се заблагодари на граѓаните за укажаната доверба и истакна дека ќе работи посветено, одговорно и транспарентно за да ги реализира приоритетите во интерес на сите жители.
-Ова е момент на одговорност и можност за Пехчево. Заедно со Советот ќе отвориме ново поглавје – со почитување на изборната волја, со отворен дијалог со граѓаните и со акција за реализирање на конкретни проекти, изјави Китански.
Од Општинската изборна комисија беше истакнато дека со денешното доделување на уверенијата завршува изборниот процес во Општина Пехчево и дека избраните претставници официјално можат да ги преземат своите функции, во согласност со законските процедури.
Во контекст на локалната самоуправа, новоизбраниот Совет на Општина Пехчево, составен од претставници на повеќе политички субјекти, ќе има задача да обезбеди ефективна соработка со градоначалникот и да ја унапреди транспарентноста, отчетноста и ефикасноста на општинските служби.
Меѓу приоритетите што ги најави градоначалникот се подобрување на локалната инфраструктура, поддршка на младите и на локалниот бизнис, развој на туризмот и заштита на животната средина.
-Нашата цел е граѓаните да чувствуваат реални резултати од секоја одлука што ја носиме. Пехчево заслужува стабилно, модерно и отворено управување кое ќе ја засили довербата во локалната власт, нагласи градоначалникот Китански.
Со денешната церемонија во Пехчево се означи почеток на новата општинска етапа, со надеж дека следниот период ќе донесе динамичен развој, подобри услуги и посилен локален економски раст.
