Во кумановското Ново Село утре со почеток во 10 часот, пред „Туршијара Суперкиз“ ќе се одржи третото издание на „Есенското Пазарче“, настан кој има за цел промоција на локалното производство и развојот на руралните средини, информираа денеска организаторите, локалното здружение за рурален развој „Ума сто“.
– На пазарчето ќе учествуваат околу дваесет мали производители од Умин Дол, Ново Село и поширокото кумановско подрачје. Посетителите ќе имаат можност да купат домашен ајвар, туршии, сокови, мармалади, слатка, месни и млечни деликатеси, како и други автентични производи подготвени според традиционални рецепти, изјави Роза Трајковиќ еден од основачите на „Ума Сто“ и организатор на настанот.
Покрај продажниот дел, програмата ќе вклучува забавни и рекреативни активности, работилница за најмладите со природни материјали и можност за изнајмување велосипеди со кои посетителите ќе можат да го разгледаат Ново Село и соседното село Умин Дол. Настанот ќе има и хуманитарен карактер. Дел од приходите, како и доброволните донации собрани преку поставените QR-кодови, ќе бидат наменети за обнова на стогодишна камена куќа што здружението „Ума Сто“ планира да ја стави во функција за понатамошен развој на селскиот туризам. Здружението „Ума Сто“ е активно од 2022 година и има седиште во селото Умин Дол. Неговата мисија е поттикнување на руралниот развој, со особен фокус на руралниот туризам. Во рамките на своите активности, здружението организира два поголеми настани годишно и повеќе помали активности со цел да ги привлече домашните и странските посетители и да придонесе за оживување на овие две села.
