Министерот за дигитална трансформација, Стефан Андоновски денеска и утре учествува на Mинистерскиот самит на Европската комисија за стартапи, истражување и иновации што се одржуваво Подгорица, Црна Гора.
Целта на самитот, кој ќе биде предводен од еврокомесарката Екатерина Захариева, Комесар за стартапи, истражување и иновации при Европската комисија, е зајакнување на стартап-екосистемот на Западен Балкан, продлабочување на политиките за „паметна специјализација“, како и унапредување на истражувачките инфраструктури и примената на вештачката интелигенција во науката.
Во програмата учествуваат: Сигне Ратсо, заменик-генерален директор на Директоратот за истражување и иновации при Европската комисија; Маида Горчевиќ, министер за европски прашања на Црна Гора; Анѓела Јакшиќ Стојановиќ, министер за образование, наука и иновации на Црна Гора; Бартож Марцинковски, претставник на полското претседавање со Советот на Европската комисија; Мартин Керн, директор на Европскиот институт за иновации и технологии; и Амер Капетановиќ, генерален секретар на Регионалниот совет за соработка.
-Министерот Андоновски ќе се обрати на министерската тркалезна маса на тема „Истражувачки инфраструктури и вештачка интелигенција во науката“. Во своето излагање ќе ги претстави приоритетите на Македонија во дигиталната трансформација: модернизација на јавните електронски услуги, интероперабилност на системите, отворени податоци и поддршка на иновации и стартапи, како и безбедна и етичка примена на вештачката интелигенција во науката и јавната администрација, информираат од неговиот кабинет.
На маргините од самитот министерот Андоновски, заедно со останатиот дел од македонската делегација ќе оствари повеќе билатерални средби меѓу кои и со еврокомесарката Захариева.
