За година и пол завршени патните правци Страцин – Крива Паланка, Градско-Дреново, Дреново-Фариш, одблокирана изградбата на автопатот Кичево – Охрид и пуштени во употреба 34 километри, работа на повеќе обиколници и забрзани градежни активности на терен на над 1200 локации. Вицепремиерот и министер за транспорт Александар Николоски информира дека интензивно се гради на автопатските делници Тетово – Гостивар и Гостивар – Букојчани, кој според него, е еден од најтешките инженерски потфати. Автопатот, пак, од Букојчани до Кичево треба да почне да се гради во март наредната година.
Опозицијата не ја гледа аградежната експанзија на власта. Лидерот на СДСМ, Венко Филипче критикува дека катастрофална била реализацијата на капиталните инвестиции. Тој вели дека заклучно со септември, биле реализирани едвај 44% од капиталните проекти. Тој алармира дека сите економски показатели биле лоши – висок јавен долг, слаба наплата на приходи и план за рекордно задолжување со еврообврзница.
Инаку меѓународните финансиски институции проектираат солидни стапки на економски раст. Откако Светска Банка излезе со проекција за зголемување на БДП од 3,1%, Меѓународниот монетарен фонд во последниот извештај наведува дека македонската економија годинава ќе порасне 3,4, а следната 3,2 отсто. Фондот смета дека годината ќе заврши со инфлација од 3,9, додека следната година таа треба да се спушти до нивото од 3%.
