Целосно реновиран болнички оддел на Клиниката за трауматологија, ортопедски болести, анестезија и реанимација. Според највисоки стандарди ќе се обновуваат и хирушките сали на оваа клиника – најави директорот д-р Игор Мерџановски. За време на реконструкцијата на оперативниот блок, дел од хирушките зафати ќе се прават во гостиварската болница, а услови за ортопедски интервенции има во болниците во Тетово и Прилеп.
Владата најавува коренити промени во здравствениот систем во Македонија – ќе се засилуваат структурните реформи од професионализација на менаџментот до зголемување на квалитетот на здравствените услуги.
“Имам чувство дека годишно трошиме околу една милијарда евра, а не го добиваме тоа што граѓаните и пациентите го заслужуваат. Но, исто така и здравствените работници, се разбира. Мислам дека има премногу надворешни влијанија, тие надворешни влијанија треба да бидат минато ако сакаме да имаме здравствен систем во којшто ќе имаме задоволни здравствени работници и задоволни пациенти” – вели премиерот Христијан Мицкоски.
Во следниот период – главен фокус за обновување ќе биде Клиниката за трауматологија и ортопедија. Мерџановски најави набавка на најнова и современа апратура. Се ставаат во фукнција три рендген апарати кои беа надвор од функција. Решен е и седумгодишниот проблем со климатизацијата на оперативните сали со поставување клими за медицинска употреба со сите филтри кои ги задоволуваат стандардите.
