Во египетското одморалиште Шарм ел-Шеик започнаа индиректни разговори меѓу Израел и Хамас за постигнување прекин на огнот во Газа, засновани на мировниот план на претседателот Доналд Трамп. Главните прашања на маса вклучуваат спорни точки како целосно повлекување на Израел од енклавата и разоружување на палестинското движење.
Здравствените власти во Газа соопштија дека 19 лица загинале во израелските воздушни напади во последните 24 часа. Првата рунда од индиректните преговори меѓу Израел и Хамас во Египет заврши во „позитивна атмосфера“, објави утринава египетската државна телевизија.
Се очекува преговорите меѓу Хамас и медијаторите во Шарм ел-Шеик да продолжат подоцна во текот на денот. Разговорите започнаа еден ден пред втората годишнина од нападот на Хамас врз Израел на 7 октомври 2023 година, што ја предизвика војната во Газа.
